Jungi Garde Fasnacht 2017

E Fasnacht mit dr Junge Garde

Ladäärne Yypfyffe

Als Seibi Damboure wurdemer nadyrlig gäärn au scho wie d‘Pfyffer am Sunntigoobe afoo mit drummle. Mer gniesse aber ainewääg unsere erschte Bligg uf unseri wunderbaari Ladäärne. Mer hänn nur e baar Ladäärnevärsli kenne spienzle, dr Räscht isch wie sychs gheert no verdeggt gsee. Verdeegti Ladäärne seet me nimme so hy g, das nde mir schaad, denn es gy nyt scheeners, als bim Morgestraich d‘Lambbe in vollschter lychtender Bracht zsee. D‘Stimmig under uns Junge Seibianer isch an dämm Sunntig scho seer guet gsee, hejoo, es goot jo nur no e baar Stunde bis zem Morgestraich. Zem guet Drummel- und Pfyffer-Kraft ztangge simmer zyttig haime und hänn zemindescht probiert, e baar Stunde zschloofe, die maischte hänn aber ainewääg gwisst, ass das nit aifach wird – d‘Vorfraid isch aifach z‘grooss.

Morgestraich

Wie gwoont simmer zämme uf dr Seibi gloffe, denn dert stoot dr ganzi Seibi-Monschter-Zuug fyr dr Morgestraich ii. Unsere Wääg isch nyt wytt, do mer jo baidi in dr Innerstadt woone, aber bekanntlig kemme die, wo am nöggschte woone, maischtens als Letschti, aber sicher nit zspoot... Uf em Wääg hämmer vyllicht z‘lang de Ueli-Gleggli zuegloost und sinn scho fescht im Morgestraich Fieber gsee... Me he sich droffe, griesst und alli sin seer guet gluunt gsee. Denn, d‘Larve aabe und me isch wider ellai, uffgreggt und mit de Gedangge ganz fescht bi dr Fasnacht und iirne vyyle Gschichte, womer au scho als Jungi erläbbt hänn. Mir baide hänn das Joor derfe in dr erschte Raje bi de Damboure istoo und das macht scho e weeneli stolz. Punggt vieri denne hets zyttlig ganz genau und perfäggt vo unserem Dambourmajer ghaisse: „Achtung-Morgestraich-Vorwärts-Marsch“. So simmer denn dur d‘Gasse gschwäbbt bis zem erschte Halt und mer hänn denn gmerggt, ass mer vyyl zwarm aagleggt sinn – e Dambour friert jo bekanntlig nie... Nooneme lange Rieme dur unseri scheeni Fasnachtstadt simmer im Hotel Rochat aakoo, womer e feyn Morgenässe hänn derfe gniesse: Määlsubbe, Gaggo, Gipfeli und Schweebli, also e gueti Sach. Nohär isch gässlet worde und nonem Abdrätte hänn mir zwai no e baar Drummel-Ründeli drait mit unserne Frinde. Denne simmer zfryyde und voller Vorfreud uff dr Cortège e Rundi Schloof go nää.

Mäntigs- Cortège

13.30h, dr Himmel he ghyylt, mir aber gar nit, im Gegedail, mer sinn normali Fasnächtler und nyt Scheen-Wätterfasnächtler, und s Wätter isch uns glyych. Während em Cortège hämmer uns derfe im Fischer-Club-Huus mit Gedrängg, Donuts und feyne Nussgipfel verpflääge - wunderbaar und dangge de Stifter. Schnäll isch dä Mäntig Nomidaag umme gsee und scho simmer wider im Rochat zem zNacht unterwäggs gsee. Chicken Nuggets und Pommes hänn uns nomool gsterggt – also alles ganz gsundi Sache, wemme dr Salaat drzue zellt... 🙂 Nonem Ässe hämmer uns an dr Schiffländi droffe mit de Junge Garde vo de JB Santihans, Junteressli, Muggedätscher und de Verschnuufer Gnepf. Dä Monschterzug het gfäggt und guet gruesst und pfyffe. Aine vo de wyttere Höhepinggt isch, ass mer mit em Stamm hänn derfe iiri Lampe u e Minschterplatz uffe drummle und pfyffe. Iidrügglig die Farbe-Pracht und Stimmig, das het uns grad no mee Luscht gmacht uff s Wytterdrummle. Nonem Abdrätte am Bruune Mutz isch unser obligats Drummelgrübbli e baar Hyyser wytter und so hämmer au dr aint oder anderi Frind uss andere Clique droffe.

Mittwuch

Mied vom Zyschtig, aber nit minder freeliger als am Mäntig, simmer wider yygstande am Seibi bi dr Stöckli Bar und loos isches gange und mer sinn vorem Stamm abglo e. In dr Staine he s denn dr obligati Stau gää – jä nu, scho fascht e Tradition. Dr Fischer Club he uns speeter nomool feyn bewirtet und im Hotel Rochat hets jetzt no e gsünders Nachtässe gää: Spaghetti mit verschiidene Sauce, Salat und feyni Glacé mit Schoggi-Sauce. Ganz e scheene Momänt isch dr Dräffpunggt mit de Gnepf, em Stamm, dr Alte Garde und de Mysli and dr Falknerstroos gsee – e Zug womer alli stolz druf sinn. Alli zämme simmer esoo ans Theater gässlet und mächtig hets deent. Im Theater hets e Göttidrungg gää. Unsere Götti isch dr Dominic W. gsee und mer hänn uns beschtens unterhalte. Nachdäm mer d‘Gnepf bim Bruune Mutz verabschiidet hänn, hets für uns zerscht emool e Pause gäh. Nohär hämmer no e letschti grossi Rundi mit dr Junge Garde drait. Nonem Abträtte sinn mer mit unserem Drummel-grübbli wytter zooge, bis mer am halbi vieri dr Stamm vor em Bruune Mutz droffe hänn und denn gmainsam zum Schnabel grötzt sinn, wo mer unsere gmainsame Ändstraich, s Ohremyggeli, drummlet und pfyffe hänn. Drnoo sinn mer ins Hotel Basel e Zmorge go ässe und hänn scho über die näggschti Fasnacht greedet, well nach dr Fas- nacht isch vor dr Fasnacht. Unsere härzlige Dangg gylt nit nur dr Olivia unserer Obfrau, wo beschtens fyr uns gluegt und gsorgt het, sondern au unserer Ladäärnemoolerin Debbie Mayer, em Zeedeldichter Dominic Buebedorf, allne Hälfer, Zugbeglaiter und em Cheffe vom Rochat 🙂