D Seibi und ihre Yysbär

Eigentlig sinn bim Seibi-Stamm an dr Fasnacht 2018 d Pinguin Trumpf gsi. Doch vom Mäntigoobe aa hett sich wyt über d Gränze vo dr Basler Fasnacht hinwäg vieles um dr Yysbär dreit. Dä überdimensional groosi Yysbär (inklusiv Goschdym isch är 2,60 Meter hoch gsi), wo-n-ys als Major stolz durch dr Cortège gfiehrt hett, isch, währenddäm d Glygge znacht gässe hett, in dr Strittgass gschtohle worde. Vo do aa isch d Suechi nach dere prächtige Larve und däm kuschlige Goschdym uff Hochtoure gloffe. D Polizei isch informiert gsi, d BVB hänn sogar über Luttsprächer in ihrne Fahrzüüg d Bevölkerig zur Mithilfe uffgruefe und au in de soziale Medie hett d Seibi kund doo, was sich für e dreischte Diebschtahl an däm erschte Fasnachtsdaag ereignet hett. 

Schliesslig isches nit lang gange, bis die erschte Hiwyys yydroffe sind. Dr Yysbär isch bim Yystiege ins Tram und am Bahnhof gsichtet worde wie au bim Usstyyge uss em 10er bi dr Münchesteinerstroos. Schliesslich hett sich d Spur irgendwo am Leimgruebewääg im Gundeli verlore. Offesichtlich isch au dr Yysbär mied worde.

Am Zyschdig sinn denn d Obmänner und unsere Major die gfroggtischte Seibianer gsi: Interview mit Radio Basilisk, ei Froog nach dr andere vo Radio Energy, e Gsprööch mit dr bz, e Delifon mit 20 Minuten und e Ussdusch mit barfi.ch. Em letschte Medium isch denn dr entscheidende Tipp uss dr Bevölkerig zuegspielt worde. E Person, wo hett welle anonym blyybe, hett dr Binci Heeb und ihrne Redaktionskollege mitteilt, ass dr Yysbär uff enere Terrasse im Gundeli stooh würd. Druffaabe sinn d Journalischte looszooge, um d Yysbär zrugg in d Stadt z hole. 

Dört hett en unsere Major, dr Thomi, denn am Mittwuch dörfe in Empfang näh. Spöötischtens nach dem Happyend isch är dr Selfie-Star schlechthin gsi. Alli hänn sich mit ebbe däm Yysbär, wo gfühlt in dr halbe Schwiz zum Thema worde isch, welle verewige looh. D Solidarität unter Fasnächtler und Nit-Fasnächtler isch riesig gsi und me isch froh gsi, ass d Seibi wieder mit em Yysbär und nit mit em Säuli (wie am Mäntigoobe) hett könne dr Räscht vo dr Fasnacht gniesse. Dr Dangg gebührt allne, wo mitgholfe hänn, ass sich dr Yysbär wieder hett könne unter d Pinguine mische. Vor allem aber seit d Seibi em Team vo barfi.ch Merci, wo drfür gsorgt hett, ass das Fasnachtsmäärli doch no guet ussgange isch.

S'Interview mit unserem Major Thomi könned ihr euch in voller Längi unde aluege. Nomol e härzliggs Merci ans ganze barfi.ch Team!